Föstudagsmolar

Föstudagsmolar eru vikulegur pistill sem forstjóri Hrafnistu skrifar með upplýsingum til starfsfólks um það sem er efst á baugi í starfsemi Hrafnistuheimilanna. Öðru hverju eru ýmsir úr stjórnendahópi Hrafnistu fengnir sem gestahöfundar föstudagsmola.
 
 
 
 

Föstudagsmolar 29. apríl 2022 - Gestahöfundur er Sigurður Ágúst Sigurðsson, forstjóri Happdrættis DAS

Búum öldruðum áhyggjulaust ævikvöld

Fyrirsögn þessi hefur verið notuð af mörgum í gegnum árin sem ritað hafa um málefni aldraðra. Þessi texti var upphaflega notaður í herferðum Happdrættis DAS í kringum 1970. Allur hagnaður Happdrættis DAS hefur farið í að búa öldruðum áhyggjulaust ævikvöld. Þannig hefur óskiptur hagnaður Happdrætti DAS verið fjárhagslegur bakhjarl í allri uppbyggingu Hrafnistu í Reykjavík og Hafnarfirði.                                               

Happdrætti DAS fór af stað með fyrsta útdrátt 7. júlí 1954 eða fyrir 68 árum síðan. Allir miðar sem gefnir voru út það ár seldust upp. Afraksturinn á núvirði í þessi 68 ár er upp á rúma 8 milljarða króna. Á sama tíma fóru 26 milljarðar í útborgaða vinninga. Tæpur milljarður rann í Byggingarsjóð aldraða á árunum 1964 – 1987 sem aftur fór í að byggja dvalarheimili út á landi. Skattur sem Happdrætti DAS eitt happdrætta á Íslandi var gert að greiða. Þannig hefur Happdrætti DAS sannarlega tekið þátt í uppbyggingu dvalarheimila um land allt.

Ljóst má vera ef Hrafnistuheimilin hefðu ekki notið afraksturs Happdrættis DAS í þessi 68 ár væri landslagið í málefnum aldraða er varðar dvalar- og hjúkrunarheimili ólíkt því sem það er í dag.   

Nýtt og spennandi happdrættisár byrjar nú í maí. Fyrsti útdráttur fer fram 10. maí n.k. Dregið er vikulega og því segjum við „Allir fimmtudagar eru DAS-dagar“. Í boði verða fimm 40 milljóna aðalvinningar auk þess sem aðrir aðalvinningar eru upp á 8 milljónir og 4 milljónir. Lægstu vinningarnir verða 30 þúsund, allt á tvöfaldan miða. Heildarfjöldi vinninga verður um 53 þúsund og útgefnir miðar 80 þúsund.

Á undanförnum árum hefur Sjómannadagsráð, sem á og rekur Hrafnistu og Happdrætti  DAS, farið í fjárfrekar framkvæmdir og þannig nýtt sér hagnað Happdrættis DAS undanfarinna ára.  Auk þess fór fram endurnýjun á anddyri og borðsal (Skálafell) í Laugarásnum og eldhúsið stækkað. Það er nú orðið eitt fullkomnasta framleiðslueldhús á landinu sem getur afkastað 2000 matarskömtum á dag, 365 daga á ári.                Þannig hefur Happdrættis DAS létt undir í allri fjáröflun Hrafnistu við endurbætur. Auk þess voru allar vistaverur á Hrafnistu í Laugarási endurnýjaðar, tvö herbergi gert að einu með einka salerni. Hrafnista í Hafnarfirði fékk upplyftingu fyrir nokkrum árum. Framundan eru kostnaðarsamar endurbætur þar. Því er mikilvægt að Happdrætti DAS verði jafn öflugt og hingað til að styðja við þau verkefni sem framundan eru og þannig stuðla að bættri aðstöðu og vistaverum í þágu aldraða. Aldraðir eiga nefnilega það besta skilið. Markmið sem Sjómannadagsráð leggur mikla áherslu á í öllu sínu starfi og þjónustu við aldraða.

Með áframhaldandi stuðningi og velvilja landsmanna með kaupum á happdrættismiða í Happdrætti DAS verður áfram sem hingað til hægt að viðhalda frekari endurnýjun og uppbyggingu í þágu aldraða í komandi framtíð. Það er í okkar höndum að vel takist til. Tökum þátt í að skapa betra líf fyrir aldraða og ekki síður fyrir okkur sjálf. Gleðilegt sumar.

Sigurður Ágúst Sigurðsson forstjóri Happdrættis DAS.

 

Lesa meira...

Síða 14 af 314

Til baka takki