Fréttasafn

Jóhanna Gilsdóttir atferlisfræðingur á Hrafnistu var með erindi á ráðstefnunni  EABA – The 11th Conference of European Association For Behaviour Analysis, sem haldin var í Prag á dögunum. Fjallað var um það hvernig nýta má atferlisgreiningu á mismunandi starfsvettvangi. Jóhanna fjallaði um starf klínísks atferlisfræðings á hjúkrunarheimili á Íslandi og kynnti fyrir ráðstefnugestum nokkur mál þar sem atferlis íhlutun átti sér stað.
Jóhanna starfar sem atferlisfræðingur á Hrafnistuheimilunum og vinnur m.a. með einstaklingsmiðaða nálgun við umönnun íbúa á Hrafnistu og færniþjálfun starfsmanna í samskiptum við íbúa.

Listahópurinn Afríka Lole heimsótti íbúa á Hrafnistu í Laugarási í gær og sýndu trumbuslátt og dans frá Guineu í vestur Afríku. Viðburðurinn var á vegum Far Fest Afríka sem haldinn var í Reykjavík í vikunni.

Þriðjudaginn 10. september var alþjóðlegur forvarnardagur sjálfsvíga. Þetta er annað árið í röð sem heill mánuður er tileinkaður geðheilbrigði og sjálfsvígsforvörnum með verkefninu Gulur september. Um er að ræða samvinnuverkefni stofnana og félagasamtaka sem vinna saman að geðrækt og sjálfsvígsforvörnum. Það er von þeirra að Gulur september auki meðvitund fólks um mikilvægi geðræktar og sjálfsvígsforvarna og sé til merkis um kærleika, aðgát og umhyggju. Starfsfólk Hrafnistuheimilanna lét sitt ekki eftir liggja og klæddist gulu í tilefni dagsins.

Á næstu vikum stendur yfir þjónustukönnun meðal íbúa og aðstandenda Hrafnistuheimilanna. 

Tilgangurinn með þjónustukönnun er að gefa stjórnendum og starfsfólki Hrafnistu innsýn í líðan og upplifun íbúa sem búa á heimilinu, til þess að geta séð hvað vel er gert og hvað megi gera betur. 

Árið 2022 var framkvæmd sambærileg þjónustukönnun og hefur hún verið nýtt markvisst til að bæta þjónustuna við íbúa og aðra þjónustuþega Hrafnistu.

Fyrirtækið Prósent, sem er þekkingarfyrirtæki á sviði markaðsrannsókna, mun annast framkvæmd könnunarinnar og er fullum trúnaði heitið. 

Með fyrirfram þökk fyrir þátttökuna.

Fyrir hönd Hrafnistu,

Jakobína Hólmfríður Árnadóttir, mannauðsstjóri

Gunnur Helgadóttir, framkvæmdastjóri heilbrigðissviðs Hrafnistu

Elva Gísladóttir, sérfræðingur og verkefnastjóri á heilbrigðissviði

Síðastliðinn föstudag hlaut Hrafnista í annað sinn veglegan styrk frá fagráði Fléttunnar að upphæð 10 milljónir króna við hátíðlega athöfn í Djúpinu Hrafnistu Sléttuvegi. Styrkurinn mun styðja við áframhaldandi innleiðingu og þróun smáforritsins Iðunnar á öll Hrafnistuheimilin, en undanfarið ár hefur Iðunn verið innleidd  hjá Hrafnistu Sléttuvegi, Skógarbæ, Boðaþingi, Hraunvangi og á Ísafold. Þetta er í þriðja sinn sem styrkir eru veittir úr Fléttunni og í ár bárust alls 44 umsóknir og var 12 styrkjum úthlutað.

Með Fléttunni gefst heilbrigðisstofnunum um allt land tækifæri til að innleiða og nýta áhugaverðar lausnir til að bæta þjónustu við sjúklinga, stytta biðlista og auka hagkvæmni og skilvirkni kerfisins. Stuðningurinn er háður því skilyrði að nýsköpunarfyrirtækin eigi í nánu samstarfi við stofnanir eða fyrirtæki í heilbrigðisþjónustu sem skuldbinda sig til að innleiða nýsköpun fyrirtækisins. Fléttan er því brú á milli einkaframtaksins og heilbrigðiskerfisins.

Hrafnista setur sér það markmið að veita framúrskarandi þjónustu til þess að íbúar og aðstandendur upplifi öryggi, traust og vellíðan. Liður í því er að efla faglega þekkingu starfsfólks, auka starfsánægju og bæta starfsumhverfi starfsfólks. Smáforritið Iðunn er því eitt af þeim verkefnum sem mun færa okkur nær markmiðum Hrafnistu.

Iðunn leiðbeinir starfsmönnum hvernig á að þjónusta hvern og einn íbúa og ávinningurinn verður m.a. betri yfirsýn á þarfir hvers og eins, auk ýmissa annarra þátta. Iðunn mun þ.a.l. auka öryggi og gæði í þjónustunni. Þróunin á Iðunni er samstarfsverkefni Hrafnistu og Helix. Hrafnista þakkar fagráði Fléttunnar fyrir kærkominn styrk sem mun styðja við tækniþróun og aukna skilvirkni í þjónustu hjúkrunarheimila.

Þær María Fjóla Harðardóttir forstjóri Hrafnistuheimilanna, Gunnur Helgadóttir framkvæmdarstjóri heilbrigðissviðs Hrafnistuheimilanna og Harpa Hrund Albertsdóttir hjúkrunarfræðingur og sérfræðingur á heilbrigðissviði tóku við styrknum fyrir hönd Hrafnistu. Harpa hefur ásamt Maríu Hrund Stefánsdóttur, lækni og sérfræðingi á heilbrigðissviði unnið að þróun og innleiðingu Iðunnar í góðu samstarfi við starfsfólk Helix og Hrafnistu.

Samfélagið hefur undanfarna daga minnt á baráttu hinsegin fólks fyrir sjálfsögðum mannréttindum og gegn fordómum. Gleðigangan er hápunktur Hinsegin daga, í henni sameinast lesbíur, hommar, tví- og pankynhneigðir, trans fólk, intersex fólk og aðrir hinsegin einstaklingar ásamt fjölskyldum sínum og vinum til að staðfesta tilveru sína og minna á baráttumál sín. Gangan er í senn kröfuganga hinsegin fólks, sem kallar eftir jafnrétti, vitundarvakningu og útrýmingu mismununar, sem og vettvangur til að fagna því sem hefur áunnist í baráttunni.

Hrafnista styður heilshugar við réttindabaráttu hinsegin fólks, fagnar fjölbreytileikanum og vill skapa örugga vinnustaðamenningu þar sem öll upplifa virðingu og að þau tilheyri.

Í síðustu viku var ýmislegt gert til að sýna baráttu hinsegin fólks stuðning á Hrafnistuheimilunum. Íbúar og starfsfólk gerðu sér glaðan dag , heimilin voru skreytt í öllum regnbogans litum, haldnar voru gleðigöngur í grennd við heimilin og fólk var hvatt til að klæðast litríkum fötum.

Meðfylgjandi myndir voru teknar á Hrafnistuheimilunum í síðustu viku.

Kæru íbúar og aðstandendur.

Töluvert er um umgangspestir, öndunarfærasýkingar og COVID í samfélaginu. Landspítalinn hefur hert sóttvarnarreglur og heimsóknartíma, en sóttvarnarlæknir telur ekki ástæðu til að mæla með sömu takmörkunum á hjúkrunarheimilum.

Aftur á móti er mælt með því að grundvallarsmitgát sé ávallt viðhöfð við öll samskipti. Því viljum við minna á mikilvægi þess að hafa persónulegar sóttvarnir í huga, svo sem handþvott og handsprittun, þegar komið er í heimsókn á heimilin.

Ef þið hafið verið veik síðastliðna tvo daga fyrir áætlaða heimsókn, biðjum við ykkur um að fresta heimsókninni þar til veikindi eru yfirstaðin.

Kær kveðja, 

Framkvæmdaráð Hrafnistu 

Samkvæmt venju var sjómannadagurinn haldinn hátíðlegur á Hrafnistuheimilunum. Gestkvæmt var á öllum heimilum og boðið var upp á sérstaka hátíðardagskrá í tilefni dagsins.
Á Hrafnistu í Laugarási hóf Lúðrasveit Reykjavíkur hátíðina venju samkvæmt út í garði en vegna hvassviðris var hörfað inn í hús. Séra Sigurður Jónsson leiddi hátíðarguðsþjónustu og í kjölfarið sáu Hjördís Geirs og DAS bandið um fjörið og sungu sjómannalögin á kaffihúsinu í Skálafelli.
Á Hrafnistu Hraunvangi í Hafnarfirði hóf Lúðrasveit Hafnarfjarðar daginn á því að spila yfir utan Menningarsalinn. Sr. Sighvatur Karlsson prestur í Hafnarfjarðarkirkju sá um helgihaldið í Sjómannamessu og Matthías Ægisson sá um undirleik á píanóið. Í hádeginu var boðið upp á dýrindis kótilettur og strax eftir hádegið hélt dagskráin svo áfram og söngkonan María Bóel söng nokkur gömul og þekkt lög við góðar undirtektir. Í kaffinu var svo boðið upp á kaffiveitingar fyrir gesti og gangandi.
Matthías Ægisson og Heiða Hrönn Harðardóttir spiluðu og sungu fyrir íbúa á Hrafnistu Nesvöllum og Hrafnistu Hlévangi í Reykjanesbæ, í tilefni dagsins og margir tóku margir undir í söngnum.
Á Sléttunni lífsgæðakjarna, Hrafnistu Sléttuvegi, sá hljómsveitin Sóló um fjörið.

Meðfylgjandi myndir eru frá sjómannadeginum á Hrafnistuheimilunum.